港股繼續大幅調整，連13500都失守埋，滙控（005）及恒生（011）繼續俾人質，市場又傳資金流走，恒指收報13454，跌277點，成交達216.46億元。
黑客話，最近歐資確實主力沽貨，主要是怕美元轉強拖累本港經濟，不過美資應會入市承接，美林唱好滙控又唱好港股，估計可見16000至18000，相信美資銀彈即將流入，短期應有一番好淡龍虎鬥。
惠理基金（VP）近期鋒芒大露，買邊隻就升邊隻。今次VP入股股權高度集中的信利國際（732），刺激信利逆市升3.2%。睇番聯交所資料，惠理持有信利6%。信利早前被監管當局抽秤，話佢有92.2%股權集中在13名股東手上，股價由03年初的2.40元急升3.75倍至昨日的11.40元。
睇番信利去年首3季業績，每股盈利為23仙，以此推論，全年合共約賺31仙，現價PE仍高達36.7倍，以VP今次接貨價每股9元計，PE都成29倍，唔通信利第４季業績真係識飛？
VP最近亦大手買修身堂（8200）、莊士國際（367）、中國綠色食品（904）及亞鋯（395）。
中國東方（581）上市首日表現不俗，亦帶動馬鋼（323）等股份炒上，下一隻新股係中怡（2341），下周二掛牌，跟住山東濰柴（2338）將於下周四掛牌，所以要留意東方電機（1072）同哈爾濱動力（1133）。市場傳濰柴超購逾千倍，但僅以10.50元定價，而非以上限10.80元定價，唔通想留番啲水位畀捧場客賺？
阿虎