大市噚日勁跌277點，小初有啲朋友嚇到沽貨沽唔切，但有啲就諗住撈底博反彈。經紀陳引述期指佬嘅評論，話個市重未跌完，真係信不信由你。
由於港股近日跌得急，先前好多無厘頭急升的股票都顯著回落，但就有部份例外，其中一隻就係之前有併購傳聞嘅鳳凰衛視（8002）。經紀黃話，鳳凰衛視將於下周三公布全年業績，跟住會有間美資大行幫佢搞推介會。
鳳凰衛視股價由今年初開始上升，最高炒過上去1.65元，近排股價雖然回吐多少，但噚日仍然守住1.55元，微跌唔夠1%。‘
經紀黃話，鳳凰衛視最近改咗年結日，由6月30日改為12月31日，所以今次公布係全年業績，唔係半年業績。
小初心諗，其實截至去年9月第１季，鳳凰衛視業績一直唔多好睇，睇怕就算多3個月，業績都唔慌好得去邊。但係經紀黃話收到料，鳳凰衛視廣告收入升咗好多，所以唔應該睇得咁淡。至於併購嘅傳聞，可能在推介會上提吓。
慕容小初