今日喺本地上映嘅勵志喜劇《阿Sir嚟自樂人谷》，美國公映以來，贏盡影評同觀眾嘅口碑，呢部極具創意嘅電影，以另類教師透過「樂與怒」嘅音樂，刺激起名校呆板小學生嘅思維、膽識同藝術細胞。
主角積伯克（JackBlack）風頭勁就唔在講啦，連今屆奧斯卡司儀比利基斯度（BillyCrystel）都大讚阿積係可以取代佢地位嘅搞笑巨星，而入面一班真係具有音樂天才嘅小朋友，亦十分搶鏡。
呢套講搖滾狂迷假扮肥阿Sir，將班房變band房嘅電影，係為《豬兜有情人》主角阿積度身訂做，佢除咗係搞笑演員，本身亦係搖滾組合TenaciousD嘅靈魂人物。
至於飾演小學band友嘅演員，係由執導過《BeforeSunrise》嘅導演連利達（RichardLinklater）走遍紐約、洛杉磯、三藩市、西雅圖等地，千辛萬苦搵班真係識得唱歌同玩樂器嘅小朋友出嚟，足足花咗五個月先埋到班。
全片嘅歌曲更加係由班小朋友親自演繹，音樂監製重特別邀請咗美國著名樂隊SonicYouth嘅JimO'Rouke嚟指導班小band友，接受為期十個星期嘅特訓，務求令佢哋練好自己嘅樂器之餘，兼可以一齊夾歌，難怪佢哋喺電影入面同阿積愈夾愈High啦！