馬丁不理美國之行會對佢本人或民主黨受到土共嚙咬，一於向良心問責，同涂謹申去咗美國出席聽證會，八方喺電視睇足佢全個記者會，覺得馬丁好似即將出席奧斯卡咁，後生咗十年，簡直狀態大勇，心情靚極。
前日記者會場面墟冚，企滿晒中外記者，馬丁要側側身先迫到入場，佢講笑話「點解條民主之路咁崎嶇？」
之後喺記者會，講到為港人爭民主之重要，佢重背起聖賢書，「雖千萬人，吾往矣」。此語係出自《孟子》《公孫丑上》，文中引述孔子同學生討論「大勇」嘅道理，就係「自反而不縮，雖褐寬博，吾不惴焉；自反而縮，雖千萬人，吾往矣。」
繙成白話即係「自己反躬自問，若自己不在理上，哪怕對方是個穿布衣嘅百姓責備我，我不也應當感到恐懼嗎？自己反躬自問，若正義在我，即使千軍萬馬，我也要勇往直前。」
所謂勇者不懼，馬丁都預咗啲土共同老共鬼咬咁嘈，又「漢奸」，又「秦檜」，又「吳三桂」，對於呢堆活在歷史中嘅化石所發出嘅噪音，咪由得佢囉。
傳真︰2623-9278
電郵︰