黃秋生同導演毛俊輝等前晚喺尖沙嘴綵排《家庭作孽》，黃秋生表示參演呢套舞台劇，佢都付出唔少代價。
問到秋生失去咗乜嘢，佢用帆船嚟比喻因拍舞台劇而損失嘅拍戲酬金，佢話：「我呢次都損失咗三隻帆船，嗰度都有二百幾萬，但我唔係後悔，只不過afford（負擔）唔起。不過，我呢次參演都有得益，我跟毛老師可以學到嘢。」
秋生憑電影《無間道II》喺第九屆金紫荊頒獎禮中提名「最佳男主角」，而吳鎮宇就提名「最佳男配角」，但喺第二十三屆香港電影金像獎頒獎禮，吳鎮宇就憑《無II》提名「最佳男主角」，兩個頒獎禮嘅提名都唔一樣，秋生覺得好奇怪，佢話：「乜你哋覺得鎮宇戲份多過我咩？但我冇留意，點安排冇所謂，邊個係主角同戲份多少冇關係，每個人準則唔同。我𠵱家忙緊舞台劇，冇時間理呢啲嘢。」
孫燕姿前日朝喺台灣，同二百幾個歌迷一齊拍攝電單車廣告，為答謝歌迷一早到場，孫燕姿同佢哋影相留念。唔使埋位時，有歌迷特登將禮物舉高，引孫燕姿注意，佢一睇到就即刻去接走份禮物。孫燕姿重同一位啱啱學識行路、唔小心衝入拍攝現場嘅小朋友玩「麻鷹捉雞仔」㖭。
陳浩民噚日喺美孚為RoadShow主持一連九集嘅節目《鱷魚先生》，介紹澳洲鱷魚專家。早排陳浩民去咗台灣拍劇，佢同佘詩曼有一排冇見面，就連情人節都冇同阿佘聯絡，返到香港就即刻約阿佘見面同食飯，重祝佢愈嚟愈靚。馮仁昭覺得呢啲祝福行咗啲喎，唔通陳浩民冇其他嘢想同阿佘講？
第四屆百事音樂風雲榜頒獎禮今個月二十八號喺深圳舉行，大會邀請咗韓國人氣歌手安七炫同BoA去到深圳做表演嘉賓。安七炫喺內地有唔少歌迷，今次佢出席頒獎禮，歌迷都非常雀躍。而BoA為咗出席呢個頒獎典禮，竟連世界巡迴演唱會都要推埋，佢哋咁搏命，睇嚟好緊張今次內地行。
向海嵐同名模歐陽妙芝噚日喺灣仔出席國際珠寶展，大會除咗送利是做酬金外，重任佢哋揀一隻手表做禮物。而向海嵐就話：「男友未送過手表畀我，但媽咪就成日送，不過嗰啲唔係嫁妝。」至於準新娘歐陽妙芝話未婚夫曾送佢名貴手表，佢哋之前一齊去咗西班牙同加拿大旅行。
吳浩康（Deep）日前為新歌《孩子王》拍攝MV，重喺曾經出現鱷魚嘅元朗南生圍取景㖭。貪玩嘅阿Deep為搞氣氛，竟然話要用自己嘅屁股做餌嚟引隻鱷魚注意。阿Deep近日除咗keep住把靚聲外，佢𠵱家每晚重會積極練泰拳，練到體重急速下降，就連一早準備好嘅衫都唔啱着，咁誇張？
