梅艷芳病逝至今已兩個多月,但有關其遺產分配仍時有爭拗,而梅媽日前入稟高等法院,控告愛女阿梅的財產信託人HSBCInternationalTrusteeLimited。阿梅胞兄指自阿梅死後,梅媽便沒有收到每月十萬元的生活費。
梅艷芳去年底病逝後,遺產交由財產信託人管理,但卻引來連串爭拗,梅媽覃美金日前更入稟高等法院,控告阿梅的財產信託人HSBCInternationalTrusteeLimited。
阿梅胞兄梅啟明昨日在電話中說:「佢哋好多嘢都交代得唔清楚,阿梅壽山村道間屋有人可以自出自入搬嘢,但我同梅媽身為阿梅親人,反而唔准去,咁樣俾人搬晒啲嘢都唔知,好唔啱規矩。阿梅生前話每月支付梅媽十萬蚊生活費,不過由去年十二月開始,直至𠵱家為止都冇再畀過錢。」梅啟明表示暫時已將問題交由律師處理。
問到梅媽若自去年十二月底便收不到生活費,經濟可有出現問題時,梅啟明即把電話交給母親。梅媽說:「咁人哋唔畀生活費我,但每日仍舊要食飯,嗰啲係我應得。」問梅媽每月的開支大概要多少?她說:「我唔食都要畀錢工人、司機,每月基本開支呢筆錢都要幾萬蚊。」因昨日天氣轉涼,梅媽自言身體不適,故沒有外出。
至於一度被指與梅媽不咬弦的阿梅生前經理人王敏慧(Marianne),對於梅媽入稟高院控告阿梅的財產信託人一事,她昨日在電話中說:「我冇意見。」而對梅啟明表示有人在阿梅死後經常自出自入阿梅的壽山村道故居一事,王敏慧說:「咁我唔知,自阿梅死後,佢間屋俾財產信託人負責管理,重上埋鎖,我知之前係有人去佢間屋攞陪葬品,但我冇份去,好似當時有財產信託人啲人陪埋一齊去,計起嚟自阿梅死後,我成兩個月冇去過舊居。據我所知,之前財產信託人啲人有去舊居搬過嘢。」
問到王敏慧對阿梅財產信託人有何意見時,她說:「冇評語,我只係幫阿梅公司做嘢,呢啲係佢屋企私事,唔係我嘅工作範圍。」再問王敏慧近日可有致電問候或探訪梅媽?她說:「唔答,我唔方便參與意見。」
此外,阿梅生前的徒弟許志安昨日在商台接受訪問,他表示不願對梅媽入稟一事表示意見,安仔說:「涉及法律問題,都唔適合講任何嘢,我諗師傅阿梅都係想大事化小,小事化無,希望件事可以盡快解決。當時都有報道話我有二千萬遺產,我都冇袋過。」
安仔又透露阿梅生前曾送了一條加持過的藍繩給他,他一直佩戴着,安仔說:「阿梅永遠喺我心中,佢雖然死咗,但我當佢移咗民。」安仔表示早前為阿梅慶祝生前最後一個生日時,大家夾份送她碧咸手表,但陳奕迅還未付錢,安仔表示打算追討欠款後,捐到梅艷芳四海一心慈善基金。
採訪、攝影:比華利、駱華齡