三點半過後，期指市場變色，港股即時散落去，全日唔見187點，期指低水171點。滙控（005）同恒生（011）除息因素計埋落去嘅話，低水幅度冇咁大，唔使過於驚青。
隔晚美國油價彈升，重高過去年3月美國打伊拉克嗰陣，油股威過一陣。中石油（857）曾見4.225元，收4.15元，仍有1格進帳。中石化（386）收3.275元，亦係進帳1格，中海油（883）收市15.90元，升幅又係1格。
油價短期勢頭仍然向上，油股都重係芬佬追捧對象，所以搵啲石油Call輪走短線。
中石油Call輪揀9405，6月到期，昨日曾見55仙，收50仙，升1格，溢價4.8%，槓桿率8.3倍。其次9445，最高43仙，收39.5仙，升兩格，7月到期，溢價8.3%，槓桿率10.5倍。兩隻輪溢價唔算吸引，不過短線做嘢，熱炒熱賣，只要正股有郁動，兩隻輪都會跟住，唔使過於計較溢價高咗啲。
中石化Call輪冇乜選擇，9909負溢價1.1%算吸引，但2.8倍槓桿率又欠缺爆炸力，其他嘅，大部份係特種輪，唔係個個啱。
中海油Call輪揀9255，7月到期，輪價37仙，溢價4.3%，槓桿率4.3倍，算係OK，但成交唔多。9421成交多，有13球易手，但溢價高到15%，雖然8月至到期同有8.6倍槓桿率，值博率有限。
章盛