古天樂最近以六百萬的厚酬，成為Lay's薯片中港台代言人，取代王力宏的台灣代言人地位。在全新的廣告中，古仔飾演為食的I.T.人，在辦公室偷吃薯片，不肯與同事分甘同味。
古天樂日前到上海為百事旗下食品Lay's薯片拍廣告，今次古仔與Lay's薯片簽下兩年合約，酬金約六百萬，未來兩年將擔任該產品的中港台代言人，據悉台灣區的代言人原本一直是王力宏，但今年開始將由人氣較盛的古仔取代。
提到取代王力宏一事，古仔不願評論，他說：「其實呢啲嘢我冇理，因為呢排有兩部戲要拍，日日都要開工，合約嘅嘢都係由經理人去搞，我只知道今次簽約係做中港台三地代言人，其他事我就唔多清楚啦！不過今次去上海拍廣告時，同內地百事嘅高層見過面，我覺得佢哋好nice，今次合作幾愉快。」
古仔在廣告中飾演喜歡吃薯片的I.T.從業員，由於辦公室規定不可以吃零食，故此當他知道全新筒裝薯片面世後，便將筒裝薯片放在抽屜內偷食。古仔昨日在電話中說：「個廣告係想介紹新出嘅筒裝薯片，同埋想吸引更多OL買呢隻薯片嚟食，今次廣告商除咗送薯片畀我食之外，又送咗好多百事可樂畀我飲。」
以前古仔經常飲可口可樂，不過他最近就轉飲百事可樂，古仔笑說：「𠵱家我屋企同架車都放滿好多百事出產嘅飲品同薯片，開工唔使怕冇嘢食。」
