個底花晒嘅前英格蘭國腳哥利摩亞，俾英國《太陽報》「放蛇」成功，踢爆佢背住妻女出去偷食，重衰到兜搭啲陌生人「打野戰」。
話說哥利摩亞喺一個郊外停車場見到一對男女，於是就上前搭訕，問對方有冇一齊興趣開集體性派對；點知嗰對男女原來係英國《太陽報》嘅卧底記者，咁即係話，哥利摩亞衰咗囉。而哥利摩亞事後表現得非常後悔，重話希望佢老婆同個女可以原諒佢。
射手哥利摩亞佢今年先得三十二歲，而且好有才華，但衰在場內紀律唔好又打女人，搞到球員前途盡毀。
佢𠵱家喺英國廣播電台講波，早前更的起心肝去考個教練牌，希望可以喺管理層發展；所以我求大俠亦奉勸佢一句，如果佢重想留喺足球圈，以後就檢點啲，咪再搞啲咁傷風敗德嘅嘢。
前世界同歐洲足球先生韋亞雖然係利比里亞人，但佢老婆係美國人，所以佢個只得十六歲嘅仔仔小韋亞，就可以代表美國，重成為二十歲以下代表隊成員㖭。美國呢支二十歲以下代表隊原本經已有被認為為明日之星嘅艾度壓陣，𠵱家多埋小韋亞，睇嚟同巴西及阿根廷有得鍊吓。
喺柏林哈化因表現唔好而被貶為後備嘅匈牙利門將基拿利，喺禮拜日贏漢諾威三比一場聯賽雖冇份踢，但就無厘頭受傷。話說佢見隊友入第二球後興奮到彈起，點知拉傷左小腿，今季隨時提早收咧。我求大俠希望其他球員能夠引以為鑑，慶祝入波時要小心，咪搞到樂極生悲。
啱啱幫「米堡」捧走聯賽盃嘅車路士借將辛頓，重未決定下季會否續留呢支東北部球會。我求大俠就覺得佢都係叠埋心水踢好「米堡」，爭番張長約好過；𠵱家「車仔」又再簽埋洛賓，加埋祖高爾、格朗基亞等，重未計陸續有嚟嘅新收購，我睇你返去真係連更衣室都冇位企囉。
勒邦占士早前雖入唔到明星賽，但佢嘅人氣仍然熱爆燈。好似喺聽日騎士主場對鷹隊場波，主隊將會送出一萬個占士嘅限量Q版公仔畀頭一萬個入場嘅觀眾，但係兩日前喺拍賣網站eBay已經炒到超過三十美金一個，有人重估計占士嘅Q版公仔起碼炒到五十蚊美金一個㖭！