中文大學推出減薪方案，教師人員暫不受影響，只係非教職人員要額外減薪（即除咗跟隨政府公務員○三三減薪之外，重要額外減）。呢日撞到一位W博士，問佢怕唔怕將來連教授都不能幸免？W博士話：「好彩我哋可以到處去教書，睇吓外邊市場點啦，好似內地大學名牌，吃香科目教授都唔知幾歎，我都想去北京教書。我上過去十次八次演講，訪問，發覺唔少北大清華名教授住幾百萬元一間嘅豪宅，原來佢哋雖然薪水比我哋少，但課餘收入驚人，工商機構邀請演講，每次最少都有五千蚊人民幣，演講幾次，收入已經係人上人，可以歎世界，唔似得我哋喺香港演講，每次都係得番一個爛鬼假水晶紀念牌也。」
經W博士一講，左丁山想起六、七年前有一次上深圳演講半小時，講完就鬆人，點知主辦單位立即奉上一千蚊人民幣，以表示謝意。左丁山都有一千，大教授收五千，絕不過份。
據W博士講，一啲本地教授（特別係教工商經濟科）上去探路之後，先到北京做訪問教授，跟住就搵到長期教職，唔肯返落嚟，情況與六七十年代，台灣教授嚟香港一樣。教授呢科行，有名就有利，四海之內皆搵錢地方，如果本港大學減佢哋薪水，好多人就會拜拜鬆人，受害者就係本地大學生。叫學者「手空空，無一物，艱險我奮進，困乏我多情」喎，桂林街時代嘅新亞書院就得啫，二十一世紀嘅名校博士，睬你都儍，而且香港GDP人均產值，名列世界前茅，點解好似窮到燶？