大市假突破，果然出事，噚日下晝在期指相關賣盤追擊下，行情大幅下滑，結果出現1個月以來最大的跌幅，恒指收市大跌187點，期指更低收13560，大低水171點，雖然扣除滙恒除息，但仍低水成70點，市場氣氛普遍轉淡。期指急挫，有消息話係斬好倉，芬佬就話個市底仍然好硬淨。不過，噚日成交超過220億元，大跌市而大成交，唔係好現象，同時，恒指亦跌穿10日線（13801），20日線（13653）好快會受到考驗。
滙恒宣布後股價俱跌，滙控（005）跌1.5元，恒生（011）跌3.5元，恒生盈利倒退，股價下跌，好正常，事關大行亦普遍調低其今年的盈利預測，但係大行對滙控嘅看法就分歧較大，摩根大通同ING睇淡，前者將滙控評級由「持有」降至「減持」，目標價由9英鎊降至8.5英鎊；後者雖維持「持有」評級，但目標價係7.95英鎊。
至於好友方面，美林最勇，指HI增長強勁，成為滙控盈利提升的主要動力，維持滙控「買入」評級，目標價並由130元調升至140元。至於BNP百富勤的目標價係130元，而中銀國際則維持滙控「優於大市」的評級。
航運業大好景，運費飆升，家下升勢係在上升循環中邊個階段，冇人知，幾時到頂，亦係冇人知，但係航運業低沉咗咁耐，講緊復甦都只不過大半年，咁快就完？
東方海外（316）係03年大市嘅明星股，04年到目前為止，就非金輝集團（137）莫屬，由4元升到上40元，大升900%，急升之後引出好多獲利貨，股價大幅回落，噚日收26.5元，同高位比跌咗33%！
過去一年，運費急升，金輝其實冇點受惠，因為大部份船隻都係簽咗長約，但踏入04年，租約陸續到期，集團已將旗下70%的船隊，以不定期或3個月期的合約租出，平均運費水平升咗3倍。03年度（12月年結）初步業績顯示，金輝獲利1164萬美元，保守估計04年度可上升至5700萬美元，每股盈利8.6元，預測PE只係3倍！
金輝調整咗5日，走勢形成三角形，降軌阻力30元，升破後，最小量度上升目標係52元。
郭兆誠