噚日天氣轉寒有雨，令工總主席梁君彥面有憂色。點解？八方同安德魯．梁食晏時，佢話好關心天氣，除咗因為天氣差塞車麻煩外，最緊要係若果周五都唔好天，就會影響佢哋搞嘅慈善高爾夫球比賽。
呢個比賽係工總搞嘅慈善籌款活動之一，主要係邀請一批肯捐款嘅商業機構，組隊打一場比賽。安德魯話滙豐、太古等都派隊出賽，而且今次更有來自美國嘅電影導演參加，但佢哋唔使畀錢，自然有人出錢。
八方睇到工總最新一期嘅月刊，安德魯喺一篇文章內提及，提交更緊密經貿安排第二輪免稅產品名單嘅最後限期本月底屆滿。本來，呢啲商品最快要明年先可以實行免稅，但工總今次想特別提出，月餅提早免稅，因為要應節。
傳真︰2623-9278
電郵︰