香港有啲業主移民外國多年，或者係長期在外地公幹，所以賣樓往往要搞一大輪先至賣得出。鴨脷洲海怡半島就有一個例子，雙方好轉折咁傾咗兩個月至達成交易。
中原分區經理王昭康講，呢個單位業主移民澳洲，臨走前放低鎖匙畀公司，同事有乜嘢，就要搵佢嘅律師行，佢間唔中同律師樓聯絡，了解單位放售情況。
業主開價七百萬，咁啱有個同屋苑換樓客想買，還價六百五萬，中記將資料交畀律師樓，透過電話同傳真越洋傾價，前後傾咗兩個月。最後，業主肯以六百八十八萬成交，重專程搭飛機返港辦理手續。單位一二八六呎，連四八六呎露台，每呎五三五零元。
王昭康話，海怡半島只得四十四個相連戶，一千二百幾呎僅十個，呢個係唯一放盤。至於千六至千八呎相連戶，現時都係得一個千六呎放盤，叫價千一萬。
自由行真係可以話對本港零售業有起死回生嘅作用，但都有帶嚟一啲社會問題㗎，例如賣淫係其中之一。
蘭西聽講，有啲「北姑」，要喺本港搵個地方落腳，但若果自己出面去租地方，唔係業主唔肯租，就係要畀好高價至租到。
所以，有啲就搵「替身」，由佢出面去租樓，租到就用嚟開業。到時業主要收番層樓都唔係咁易。
上個月樓市咁旺，代理梗係好「肥仔」啦。美聯高級經理羅文駒話，該行因促成多宗豪宅買賣，佣金逾五百六十萬，創住宅分行98年以嚟單月新高，八成生意嚟自二手。連埋1月份，該行嘅佣金收入已經過千萬。
另外，利嘉閣2月份佣金收入六千五百萬，都破98年以嚟新高。全公司有二十四組佣金過百萬，最高一組係又一村分行，超過四百萬。睇嚟該分行舵手曾令智應該好「肥仔」嘞。
兩家代理行最高佣金收入嘅分行，都係做豪宅，足證豪宅之旺。
樓市連旺九個月，代理行收入豐厚，投資者同炒家都搵到食。有業內人士話，政府其實都係受惠者之一。
蘭西睇番噚日公布嘅土地註冊處數字，1、2月樓宇買賣合約登記總值，分別係二百二十六億，同三百零五億，假如用釐印費百分之二計，政府夾埋就收到十億幾嘞。舊年同期政府嘅收入，只係得四億五。
當中重未計埋其他同地產行業相關公司嘅稅收，唔怪得政府財赤都降低咗啦！
蘭西
電郵地址：
