赤柱富豪海灣銷情報捷，負責賣樓嘅范統，噚日開完記者會，請晒所有記者去卡拉OK，唱歌兼食晏慶功。
平時不苟言笑嘅范統，原來好玩得，到場之後，率先高歌一曲張學友飲歌，之後又同記者猜枚同玩骰盅，罰記者飲酒，相當興奮。
不過，佢玩樂之餘不忘做生意，電話全程響個不停，大部份都係代理打過嚟傾價，搞到范統唱唱吓歌都要行出去慢慢傾。兩個鐘頭係咁出出入入，最後重神秘離場。
富豪海灣呢幅地皮，係富豪集團喺97年摸頂買入，總成本超過一萬蚊呎，個盤喺半年前開賣時，集團一直抱住蝕少當賺嘅心態去做。
估唔到近排個市一下子旺番咁多，豪宅樓價重直迫96、97高峯期，富豪海灣就愈賣愈貴，最近賣嗰批，全部呎價過萬，范統自然好開心，重話睇個勢唔單止唔使點蝕，重有機會賺錢㖭。