胡溫挑動特區文革，土共左仔癲狂復發，終於玩大咗，香港民主政制問題，本來係香港內部事務，驚動到民主自由守護神嘅美國。美國參議院轄下外交關係委員會突然召開聽證會，民主黨總統熱門候選人克里亦會出席，重邀請埋民主派重量級人物到會㖭。多得土共從旁協助，證明香港作為一個國際城市，都重幾有吸引力。
八方一早善意勸告過阿胡溫，包庇班土共搞文革，打壓民主訴求，一定會增加胡溫努力化妝嘅所謂國際形象，例如外訪歐美，例牌含住泡眼淚吟新詩嘅做騷困難度。點知食豬紅，屙黑屎，美國終於根據九七前喺國會通過嘅《香港法》，以及參考埋喺聯合國以國際協議形式註冊嘅《中英聯合聲明》，正式審查特區問題。特區有啲文化人當堂面青，覺得好憂慮，話慌怕事件會「更加複雜」。
更加複雜？自胡溫指派曾憲梓、鄔維庸出嚟唱文革歌曲、發出「香港人係狗，食太多狗餅」嘅文革批鬥後，特區形勢就一早已升級複雜咗。美國干預香港內政？又唔可以咁講。美國係中資之外嘅香港最大嘅境外投資者，當初掟錢落嚟香港，係假設「港人治港、高度自治」承諾有效，香港實行英式法治管理，同埋信任中國會遵守《基本法》條文，保障投資回報。點知七年未夠，土共政變，奪位爭權，香港本來一早就淪為一個中國沿海嘅普通城市，點知𠵱家重衰過中國嘅沿海普通城市──大連、青島、上海、廈門，有邊個中國沿海城市𠵱家重要由領導人帶頭大唱《沒有××黨就沒有新中國》，又有邊個中國沿海城市，要大搞「揪出黑四類」，並警告隨時會頒令進入緊急狀態？
做生意，好對唔住，最緊要係營商環境。若然喺砵蘭街開咗間茶餐廳，本來風平浪靜，突然間條街出現黑幫，又燒車、又搶掠舖頭，又無喇喇指住樓上啲居民狂嗌，講粗口，係咁叫人哋落街同佢隻抽，咁茶餐廳老細，都應該問管轄呢條街旺角警署
至於民主派，若然成功獲邀，去出席聽證會，除咗有義務將曾憲梓所唱歌仔嘅歌詞全文，繙譯為美式英語唱番畀美國國會聽、同美國友人一齊分享其中樂趣之外，重可以反過嚟干涉美國內政，將陳啟宗等美國人在特區教訓港人應該點樣愛RedChina嘅言論，轉述畀國會知，並附交特區所有持美籍、或老婆仔女擁有美國籍又狂喝令港人愛中國、擁有黃皮膚嘅偽美國人名單，質問吓美國政府今日亂咁畀呢亭黃面佬入籍，明日又會唔會畀拉登入籍，係咪應該效法前港英甄別越南難民身份嘅機制咁，將一啲愛中國唔愛美國民主嘅不合格政治難民褫奪公民權，永久性驅逐返佢哋所熱愛嘅中國。
傳真︰2623-9278
電郵︰