我羅拉覺得咁多任日本首相嚟講，現任嘅小泉純一郎都可以話係最平民化兼最留意藝能界消息嘅首相喇，可能係因為佢個仔都係藝人嘅關係，佢都好樂意接待班明星，就連佢自己都推出過靚仔寫真集啦！
不過小泉又唔會恃住自己係首相，唔係大粒到湯告魯斯（TomCruise）咁嘅星就唔見，相反近年佢同t.A.T.u.又可以一齊玩、細星加藤愛、酒井美紀都可以相見歡，見佢咁鬼濫，似乎又會令人覺得佢太清閒囉！
好似噚日咁，小泉就喺官邸會見西班牙電影《對她有話兒》嘅女主角莉安娜韋汀（LeonorWatling），全程佢哋都閒話家常，文化交流呀、顯示國際友好呢啲預期中嘅話題都費事講，小泉淨係喺度猛咁讚莉安娜靚女，又話：「我周圍同人推介《對她有話兒》，人哋問我點解鍾意睇埋啲咁偏門嘅戲，其實真係好好睇㗎！」而當莉安娜送隻簽名DVD畀小泉時，佢睇落又真係好高興咁喎！
見小泉接見完西班牙女優就急急腳走人，似乎有緊要嘢未做。原來佢平日來往官邸，都留意到附近有間小型拉麵店有好多人，每次佢都好儍氣咁話：「間舖好迫人啊！」到噚日佢秘書長引誘佢去食，小泉就好似夢想成真咁，食完重猛叫正斗㖭！