沐浴喺愛河中嘅女人，真係乜嘢事都做得出，好似公仔箱有位上緊位嘅新紮姐仔，最近結識咗位有錢有地位嘅男友，為咗同男友拍拖，呢位新紮姐仔竟然夠膽死詐病唔開工！
話說上星期馮仁昭個老友喺港島區某商場行街，迎面見到一個戴住黑超同鴨嘴帽嘅靚女，拖住男友好煙韌咁行街街，由於嗰位靚女戴住嗰副係超級大黑超，所以特別惹人注目。馮仁昭老友好奇望多兩眼，先至發現呢個靚女原來就係新紮姐仔。不過，新紮姐仔當日明明同公司請病假，但轉頭佢竟然陪男友行街，咁做法咪即係詐病！
馮仁昭聽聞呢位新紮姐仔個男友係喺外地工作，唔係成日留喺香港，由於同公司請假陪男友實唔批，所以新紮姐仔索性詐病！新紮姐仔為怕俾人發現，所以出街時由頭包到落腳，但天網恢恢，如果俾公司知道佢咁搞法，新紮姐仔實聽打入冷宮！
麥浚龍（Juno）噚日上新城做節目嘉賓，宣傳佢首新歌，Juno之前已經為首歌拍咗MV，重自己做埋監製，MV入面有啲火燒手腳危險鏡頭，重係佢自己構思兼親身上陣，Juno話拍之前都唔敢同媽咪講，驚媽咪會擔心。最近Juno重作咗三首歌，其中有首難度幾高嘅想畀容祖兒唱，𠵱家就等緊對方回覆。
王傑噚日去咗商台接受《叱咤樂壇》訪問，對於同公司嘅容祖兒可以一年出成三、四張碟，佢就話自己喺呢行十七年，出唔出碟都唔會介意，跟住語帶雙關咁話：「大家心知肚明啦！」王傑覺得𠵱家好多歌手靠新聞包裝，自己一定唔夠爭，唔通叫佢喺街度裸跑咩。
無綫最近搵番自己藝員主唱節目或劇集嘅歌曲，唔少藝員知道之後不知幾咁雀躍，希望一嘗做歌星嘅滋味。馮仁昭聽聞胡杏兒、吳卓羲同葉璇主演嘅新劇《西廂奇緣》，會率先搵幾位主角去試唱主題曲，但究竟係三個中搵一個獨唱，抑或一齊合唱，監製張乾文話目前重度緊喎。
周渝民（仔仔）日前接受新城娛樂台訪問，話好渴望可以拍拖，因為佢好想感受到甜蜜感覺。不過近日台灣就有仔仔嘅歌迷，為咗親近仔仔差啲失身。嗰個歌迷因為經常喺網上問人有關仔仔嘅消息，結果有人利用仔仔騙財騙色，好彩有人想呃佢上床時，個歌迷冇上當咋。
日本長青組合SMAP，近幾年已經冇被傳話拆夥呢啲消息，但前日有報章話，SMAP同佢哋嘅師弟組合TOKIO同KinKiKids交惡，不停投訴事務所分配資源不均。報道重話最近情況不斷惡化，SMAP重威脅如果事務所唔以佢哋為重，會拉隊離開獨立喎。
台灣小天后蔡依林同徐熙娣（小S）噚日喺台灣做節目錄影，蔡依林着咗一條迷你裙到場，小S見到佢就好妒忌，重將自己條裙拉高，證明自己都有本錢着迷你裙。問蔡依林若要投保身體一部份，佢會保邊度，佢用國語話：「我會選擇腳和眼睛，因為我的腳踝跳舞易受傷。」
