話咁快政協人大又開大會，各路自稱愛國男女，猛咁發炮噴口水鬥愛國，口水可以帶有病毒，喺禽流感加沙士嘅陰影之下，都咪話唔驚，所以我哋偉大祖國都特別為此做足預防措施。
首先，各位政協人大上京之前，中聯辦已經為佢哋安排好打流感針，雖然防唔到禽流感，但至少都打定個底加強抵抗力。一班政協噚日一到北京，喺酒店房間就發現一個由中央保健委員會辦公室發出嘅保健公文袋，打開一睇，當堂為祖國嘅關懷會心微笑，因為入面唔只有一支探熱針，重有字條寫上六點注意事項，包括提醒大家小心患呼吸道傳染病、要注意衞生、食生果一定要洗淨去皮、如廁就要小心滑倒摔傷等。
政協們又要好似學生哥一樣，每日開會前先量體溫，如果超過三十七點五度，就要打電話通知醫療隊伍，並且留喺房等醫生，以免有乜依郁，將啲病毒傳染畀領導人就大件事。
除咗提醒，重要補身。每個政協委員間房都有陝西蘋果一盒，零食糖果一箱，重有駐京辦送嘅茶葉一罐（不過就冇包括狗餅喎），黨嘅恩情多着數，唔怪得咁多人爭住愛國愛黨咯。
（圖）陳鑑林上京開政協會議，收到大會送嘅生果同零食一大堆。
傳真︰2623-9278
電郵︰