早兩年因為有套以消防員為題材嘅漫畫大受歡迎，一時間多咗好多消防員電影、電視，今次消防員更走上PS2；由KONAMI製作嘅《FIREFIGHTERF.D.18》，玩家就化身成為消防員，要冒險進入火場救人兼救火，過程驚險刺激，自問對第一身動作遊戲有多年經驗，亦覺得好有新鮮感，值得一玩。
記者：許福合
遊戲類型：動作
對應機種：PS2
遊玩人數：1人
開發商：KONAMI
(c)2003KonamiComputerEntertainmentTokyo
《蘋果》優惠價$399
咁正嘅Game梗有着數畀各位，只要拎住今日本版，到灣仔DreamStore購買《FIREFIGHTERF.D.18》，即可以享有優惠價$399（原價$420），各位消防員迷記住唔好錯過。
售賣點：DreamStore
查詢電話：25753285
地址：灣仔東方188商場256號舖
稍為做啲資料搜集，就知道消防員嘅工作實在非常廣泛，所以配備咗唔少工具，遊戲中嘅玩家最常用嘅道具係水喉同斧頭，《FIREFIGHTERF.D.18》內，玩家嘅最終目標係救人逃出火海，所以水喉就係最重要嘅武器，將沿途嘅火救熄，不過遊戲限時進行，同時亦要將災民被火燒前救出，所以最聰明兼省時嘅方法係從右上角嘅地圖搵出災民位置，再用水喉開出條生路，間中或會遇到障礙物，咁就要出動到斧頭開路！
不過火場又點會射吓水就救得人咁簡單，進入火場會遇到唔少危險，會有石塊從上跌下，路面甚至會留有油迹，一個不小心踏上就會跌倒，更危險係會有地方噴火，甚至會有爆炸出現，不過最難搞都係有煤氣洩漏嘅火區，射極都救唔熄，反而會不斷有火種飛出令四週起火，呢個時間先要救自己，將水喉改成花洒噴射，救熄附近火種，再急Call支援，會有支援隊友拎住強力冷凍劑發射，滅火效力特強，不過係有限數，真正有需要時先至用，情形有啲似其他動作Game嘅必殺技咁重要。
玩《FIREFIGHTERF.D.18》還有一個特點，就係現場感十足，尤其係起初一幕講消防員進入火場前，被女記者激親，話每次進入火場都絕對唔輕鬆，雖然只係CG片段，但製作認真，現場氣氛十足。至於遊戲玩法雖然由一般揸槍變成揸水喉，要上手都唔難，尤其因為水喉不斷有水噴出，玩家就更容易控制準繩度，遊戲最難之處，係要搵出最快嘅途徑救人，同時又要避開失驚無神跌落嚟嘅石塊。新手試玩時，最好揀EasyMode開始，因為沿途會有生命箱執，而消防員回復生命速度亦較快，用嚟練習就最啱。
