萬人迷靚仔球星碧咸（DavidBeckham）老婆Victoria，近年一味借老公名氣增加曝光率，歌唱事業一蹶不振，我大口羅拉一早覺得佢根本唔係咁受歡迎，最近佢出咗張DVD喺英國滯銷，已經係最佳證明。
Victoria同SpiceGirls班隊友散咗band之後，雖然一直好想做歌手，佢上年重係威係勢咁話錄新碟，但唱片公司覺得呢個師奶啲歌好唔掂，所以最後都只幫佢出盒DVD滿足吓佢。呢盒DVD叫《TheRealBeckhams》，擺到明又係Victoria借老公個名搵錢，入面除咗有Victoria新歌MV片段之外，亦有唔少佢同老公、大仔布魯克林（Brooklyn）及細仔羅密歐（Romeo）嘅生活片段。
好明顯啲英國人已經覺得Victoria一家曝光率太多，令人睇到都有啲滯，張DVD出咗大約一個月，只係賣咗七千隻，喺DVD銷量榜只排第九十五位，認真羞家！啲英國傳媒認為呢件事反映咗Victoria嘅歌唱事業已經玩完，不過Victoria嘅發言人重死撐咁話：「呢張DVD唔算係音樂產品嚟㗎！」唔知Victoria係咪重想出碟丟架呢？