滙控（005）派全年成績表，賺87.74億美元，增41%，同市場預測相符。新盤去貨掂，但地產股冇再搶多一搶，恒指只係微升11點，冇過熱到，有利後市發展。
滙控派完成績表後，下鋪焦點，會喺長和系身上。長實（001）同和黃（013）早段皆搶高1元，埋單平收。
龍虎榜上，排第2嘅係長實Call輪9598，收26.5仙，大升23%，今年7月到期，溢價22%，槓桿率28倍，得12萬份成交，成交少唔可以完全作準。如果用佢作為長實未來走勢指標，即係話升定等正股升，要買Call輪嘅話，正印主角係9160。9160收54仙，跌4仙，5月到期，溢價4.2%，槓桿率13.8倍。呢件係長實Call輪中，成交金額最勁嘅，喺全部Call輪成交金額中，亦排名第7，買賣易。
和黃同長實都係18號派成績表，3G計劃股民已心中有數，估計張成績表會獲得芬佬收貨，上月高位69.25元，𠵱家65.50元，有上升水位。和黃Call輪，又可以搵啲嚟博吓，揀隻最熱嘅埋手可也。9066收61仙，跌3仙，啲數據好靚，4月到期，溢價0.9%，槓桿率10.7倍。一個唔覺意，正股上番上次高位，隻輪可以升45-50%，爆炸力好勁。
章盛