水貨大亨袁仁祥又上潮界雜誌，暢談走原宿水貨心得。佢靜靜雞同我講原來佢想做完「彩光」先上鏡訪問，可惜撞正原宿有勁貨推出；咪睇袁仁祥外表剛烈硬朗，其實暗地裏佢都係貪靚鬼一名；究竟原宿有乜嘢勁貨推出可令佢拋低儀容不理？袁仁祥左手捽耳仔，右手揸水貨煙解釋：「嗰輪撞正UnderCover出『溶解Tee』，全香港水貨佬立即飛過去搶貨。設計師高橋盾呢批貨好有諗頭，將同一個設計卻分兩個價錢：8,000日圓嗰款屬正常Design，件衫冇任何花巧，着住都唔知係名師出品。另一款就貴成3倍，成22,000日圓，成件衫無論圖案同Cutting都變晒形，感覺好似溶解緊，所以行內人就嗌呢批貨為『溶解Tee』。唔好以為平價嗰款最多人搶，我哋返貨後至知啲客原來想要22,000日圓嗰件正宗『溶解Tee』，返轉頭補貨已經太遲。聽講呢批貨只得銅鑼灣V3獨具慧眼，只返貴價嗰款，賣十算即2,200蚊港紙，唔使一日已被班『時裝受害人』掃光。」
主持人：大食Jack
八卦熱報：
