陳錦鴻與杜雯惠拍拖多年，終於上月中在港註冊結成夫婦，但二人婚禮簡單低調，沒有禮服、戒指和結婚相，更沒有擺酒，連度蜜月也未知是否成行，陳錦鴻昨日說：「希望抽到時間去中國黃山度蜜月。」
陳錦鴻和DJ杜雯惠拍拖多年，二人終於在上月十五日，即情人節翌日低調註冊結婚。昨日陳錦鴻與佘詩曼、陳松伶、馬德鐘及文頌嫻等到將軍澳電視廣播城為新劇《驚艷一槍》試造型，提到結婚一事，陳錦鴻說：「我哋二月十五號喺香港註咗冊，之後冇擺酒，雙方家長食咗飯囉。本來我哋想喺外地註冊，但自己酒樓生意又忙，抽唔到時間，希望遲啲抽到時間度蜜月啦，我諗住去黃山。」
陳錦鴻今次結婚可說十分簡單低調，連交換戒指也沒有，二人只着便服出席，他說：「我哋好causal，連婚紗相都冇影，又冇交換戒指，又冇着禮服，我問過註冊處嘅人，話唔一定要着禮服或者有乜儀式嘅，其實最緊要係雙方誓約。」
問到杜雯惠會否介意不拍結婚相？陳錦鴻說：「我自己影得太多呀，冇需要啦，如果老婆想影，佢就會提出啦。」問到之後會否補擺喜酒，陳錦鴻說：「我唔想鋪張，擺酒易，請人飲好難㗎。」至於宣誓時有沒有感動流淚，陳錦鴻謂：「呢啲嘢控制得到，隨緣啦。」
此外，陳松伶透露她在新劇中飾演亦正亦邪的妓女，她說：「我係『無間雞』呀！會同石修、馬德鐘有感情戲，之前導演特登攞張豔情片《愛奴》嘅VCD畀我研究，係何琍琍同貝蒂做嘅，我一見到封面就覺得好正。」而佘詩曼又表示她將於七月約滿無綫，稍後會傾談續約，她說：「𠵱家拍古裝片佔咗我三分二嘅比率，我希望以後時裝同古裝可以平均啲，我喺無綫出身，已經七年，就嚟攞埋金牌，好大機會續約，我不擅應酬，唔適合出去闖。」
採訪：卓寶花
攝影：陳烱威
