發展商賣樓，好多都會為個盤整個網頁，等啲冇乜時間嘅人上去睇，有興趣至去參觀示範單位或者實地睇樓。
樓盤網頁來來去去都係基本資料，位置圖、平面圖、裝修用料、會所設施，或者交通及校網等資料。
蘭西最近睇過信和將軍澳蔚藍灣畔網頁，發覺有樣嘢幾與別不同，加設咗個小小嘅心理測驗，由家居布置睇性格，捉正港人嘅喜好，咁好自然會去接受測試啦！睇睇自己屬於邊一派。
答完五條選擇題，可以即場睇結果，大致分為幾類，豪華派、時尚派與熱愛家庭派。答案裏面會話畀大家知，原來，蔚藍灣畔有齊各種性格人士嘅要求。設計呢個心理測驗嘅人果然係高手。
𠵱家要業主放盤，認真唔容易，就算肯放，分分鐘會反價，買家可以做嘅就係追價。
利嘉閣分行經理鄭雄雯話，沙田富豪花園就有個單位，買家要六度追價至買得到。
呢個單位係G座中層C室，一一二五方呎。業主最初叫價二百一十萬，後嚟見樓市一日好過一日，曾經一度封盤。後尾解封後再提高叫價，但個買家好鍾意呢個單位，結果要追價六次，用二百三十五萬至買到。
買家係同區換樓客，因同區可以揀嘅唔多，買富豪花園，貪佢交通方便同價錢平啲。
發展商賣樓好多時都喺報紙賣廣告，呢點香港同內地一樣。
戴德梁行最新一份物業報告指出，舊年第四季，深圳新盤賣廣告（特區報同商報）次數，比第三季少一成，只得七百次，原因係推出嘅新盤，以中小型住宅為主，而且唔少位於寶安區。呢個區嘅新盤，一向好少喺呢兩份報紙賣廣告。
不過，發展商嘅賣樓手法推陳出新，好似漾日灣畔同碧海雲天等項目，就借助中國省部長會議論壇舉行，喺特區報一次過登咗四個全版廣告嚟吸引買家，夠晒矚目。
由於舊年第四季，寶安區共有十二個新盤開賣，比第三季多逾一倍，所以拉低咗深圳整體住宅平均呎價七個巴仙，只得五百二十蚊。
鰂魚涌逸樺園舊年年底開賣，成為港島東區新指標。
幾日前，就由中原做埋最後一個Penthouse，成個項目終於賣晒。中原重攞咗最後一個銷售大獎，促成三個Penthouse，十萬蚊獎金袋袋平安。
中原高級區域經理吳炳深（圖五）話，計番逸樺園由舊年8月，第一個攀石賽「牙骱戰」，中原勝出後，就由頭帶到落尾。
有關逸樺園嘅比賽大約有五個，都攞晒冠軍。果然做到頭威頭勢嘅效果。
過去幾年，樓市不景，成交大減，樓價又連年係咁跌，同地產相關嘅行業都苦不堪言，惟有不斷收縮業務同減薪裁員度過難關。𠵱家個市一下子急速好轉，搞到呢啲行業大鬧人手荒，做樓契嘅律師行，就係其中之一，據講就算加班都做唔切。
另外，最近買家買樓，上到律師樓，負責嘅員工，會將啲合約條款，完完全全咁讀一次畀個客聽，然後要個客簽紙證明，同以往講吓啲大要唔同。
聽講，咁做係怕啲客第日因樓價下跌遭受損失，以律師行不專業做理由索償。
蘭西
電郵地址：
