馬會主席夏佳理最近接受土共報紙專訪，有一半中國血統嘅佢，竟然冇被人喝令就愛國論表態，叫佢講鍾意食咖喱定點豉油，真係好彩。君不見話過老董在位、樓價一日唔會升，但「×臨天下」就起到萬元一呎嘅陳啟宗，身為黃皮膚聲聲以美國人為榮，都獲邀發表愛國論，簡直肉麻兼骨痹。
夏叔好嘢，未卜先知，估到班土共遲早會清算非我族類，隨時會被驅逐出境，好似有個英國護照嘅吳靄儀就被馬力點名批佢無資格講國安法，所以佢老哥喺二千年，離開政界呢個是非之地，轉去搞馬照跑。
八方早前見到夏叔，原來夏叔只係賭馬不賭波，重笑話由始至終，只捧一隊球隊就係阿仙奴，「隊波冇輸過波」。真係喎，阿仙奴係今季英超聯嘅長勝軍，上個星期六以二比一氣走查爾頓，成為奪標大熱，重分分鐘會有機同皇馬爭歐洲球會冠軍。夏叔捧阿仙奴，老董就只識利物浦，兩人眼光，真係高下立判。
傳真︰2623-9278
電郵︰