特區文革不斷深化，兩份土共左報，擒日統一頭版標題，大唱○七及○八普選冇可能，公然當曾蔭權領導嘅諮詢小組冇到。
既然兩共報經已代表胡溫宣示國家正式立場，咁煲呔重就政制改革諮詢啲乜？諮詢要花費大量公帑，登廣告要印紙張，要請大量人手處理表格文件，兩共報取代新聞處，亦踩住廢董嘅陸軍裝頭，發布重大政策，咁就證實八方上星期所透露：土共發動「愛國水口戰」嘅文章，亂中奪權，政變成功。
唔怪得護法許崇德接受左報專訪，以官方身份，破天荒點名批董，話廢董「太忠厚」，唔識得運用中央畀佢嘅權力，搞到行政疲弱，七年來亂作一團。胡溫嘅最新立場，特區嘅一啲土共亦早已收到，喺親中報刊，時不時點名老董大罵佢無能，經已一啲都唔客氣。
又傳出提早踢走廢董，畀梁振英接班坐正嘅傳聞。不過，愛國陣營之中，對梁振英其人又有唔同睇法。好多愛國傳統人士唔順呢條友半途先至愛國，有啲人士亦唔可以原諒梁振英佢伯爺舊時做過警察，駐守過港督府，以文革嗰隻「龍生龍，鳳生鳳，老鼠生兒愛打洞」嘅推論，梁振英冇可能百分之百愛國。
況且，英哥一上位，咁早過佢愛國嘅老同胞，變咗即時要受佢領導，例如民建聯嘅曾鈺成、馬力、工聯會嘅棠哥，佢哋愛國資歷早過振英哥，久經考驗，而且喺祖國冇生意，梁振英做咗特首，點樣令到老愛國心服？
咁又係，傳統愛國人士等咗幾十年，就係想等到上位嘅一日。老左對廢董失望，係因為廢董派餅後，只識派畀梁振英、田氏兄弟，同埋信晒狗餅庸、譚惠珠等港英舊電池，所以對廢董因愛生恨，點可以有一個「董振英」再上位？
當年文革嘅王洪文，何嘗又唔係好似何鴻燊話頭，出身貧窮，仇視財富，上得快，冧得又快，祖國嘅政