前一排本欄講過，一本一月創辦嘅《港人月刊》，在報攤不知所終，報販話俾人收番晒，冇得賣。呢本月刊係由何銘思出面嘅，佢與霍英東嘅關係密切，係人都知啦，揀○四年一月出版，或有理念㗎，點知出第一期就失蹤啫。
一位有心人特登寄上《港人月刊》創刊號嘅主要文章，就係「民主與愛國為何不共戴天，葉國華提出民主、愛國、務實大和解。」好多謝呢位有心人讀者，左丁山得以一窺全豹。
嘩，邊睇邊嗌，嗌乜呢？嗌「不如搵葉國華做特首」呀，以前從來唔知葉國華做特首顧問，究竟做過乜鬼，以為佢冇料到。睇完呢篇訪問，先知道原來冇人肯聽佢支笛啫！葉國華認為司徒華李柱銘應被包容，香港應走一條民主、愛國、務實的路，愛國和民主是沒有矛盾的。董特首應該帶晒所有人士，包括民主派上北京，討論政改、民建聯要去掉左派原有的價值觀和思維方式，民主派要務實一點，唔好去得太盡，挾民意逼北京。
葉國華講北京來人瞎指揮，好好笑。佢話：「一些剛來港的二十多三十歲的甚麼處長、局長，可以將本地人點到陀陀擰，彷彿只要他們頭上有一個北京的光環，就已經神聖地知道一切……民建聯在這樣的情況下被他們指揮，唔死就有鬼啦！老董又甚麼都聽他們講，有甚麼辦法不搞到和香港社會越來越脫節，越來越離心？」𠵱家我哋清楚晒，北京人來點住晒，重有乜好講？