以曾憲梓為首嘅「紅四類」人馬，當中包括噏得就噏嘅「四大護法」如許崇德、掛正招牌嘅人大政協如狗餅庸同埋火紅奶、濃髮波、唔夠人選嘅政黨代表馬力，加埋兩報一刊嘅評論員，舉行香港版文革大合唱，喺特區搞秋後算帳式嘅農村式公審，誓要熱愛民主及自由嘅港人跪玻璃方罷休。
搞成文革咁嘅款，四人幫已經跳晒出嚟，開始變為異形，可憐港人如夢初醒，好多後生一輩從未聽過啲咁恐嚇性嘅語言，更唔知道共產黨當年如何三反五反，永無寧日，連最近被捧為永放光芒嘅鄧小平都曾經三上三落，被人鬥得你死我活。
至於基本法嘅爭拗，本來已成為歷史，不過，既然班土共要抬啲舊話出嚟講，一眾後生記者也只好惡補。有一日，大家撞到前草委譚耀宗，叫佢開班話當年，譚耀宗答應得好爽快，重話請埋班當年跟基本法嘅老記者出席，咁就真係有排口水喇。
（圖）譚耀宗好爽快咁答應為一班後生記者補習基本法。
傳真︰2623-9278
電郵︰