立法會議員黃宏發雖然好杯中物，無酒不歡，但係人人都知佢家有賢妻，從無緋聞，點知早前俾壹仔撞到正，重影埋佢同一位成身名牌嘅中年貴婦喺太古廣場並肩睇玩具，認真大件事。
八方上周五喺立法會議員記者同樂日見到發叔，梗係唔放過佢，趁佢未酒醉，代黃太問個究竟？發叔好大方咁話，嗰位貴婦其實係佢以前教過嘅學生，冇嘢㗎。咁八方問佢有冇買晒擺喺屋企附近報攤上嘅壹仔，費事老婆睇到誤會，點知發叔話冇，就算買都冇用，因為老婆已經睇咗。
咁咪有排解話囉。發叔扮老定咁笑話學生之嘛，有乜問題喎，但係同枱食普飛嘅麥國風就死要笑佢，不停口話學生咁又點喎，學生做女朋友有乜問題啫？發叔真係差啲俾佢激死。好彩發嫂唔在場，否則真係唔知點收科。
傳真︰2623-9278
電郵︰