中國南下鬥香港場世界盃外圍賽重有近一個月先舉行，但中國隊已經積極備戰，教頭阿里漢誓要抹煞當年「五一九」之役再次重現。
國足日前經已開始集訓首課操練，重安排分組賽，務求盡早催谷班球員狀態；阿里漢亦非常緊張友賽對手，自從打完科威特之後，一直要求中國足協盡快落實隊伍。原本約戰越南，後來因為禽流感，最後改戰敍利亞，比賽會喺廣州市進行。有傳阿里漢咁緊張，就係因為出現咗八五年「五一九」之役，搞到佢驚國足隊「一朝被蛇咬、十年怕草繩」，唔想歷史重演。國足壓力咁大，我求大俠認為香港隊唔係無機會搶分，波係圓嘅，邊個敢寫包單贏梗，尤其我哋喺小西灣主場㖭！
紐卡素日前聯賽又衰收尾，俾樸茨茅夫最後一分鐘迫和，士哥球員正係紐記借將路亞，領隊卜比笠臣賽後就更係唔想對路亞表現發表任何評論。其實，好多球隊都唔會畀借將倒戈，就係怕出現呢類情況，我求大俠真係唔明卜比笠臣諗法，如果季尾差一分排唔到第四，到時重一肚氣！
日本上月中喺世盃外圍賽主場僅勝阿曼一球，引起好多當地球迷不滿，而日本足總日前爆料，包括新希望小笠原滿男在內七位球員，比賽三日前違規蒲吧，更涉嫌性騷擾女店員。有傳中場村俊輔亦係其中一人，如果屬實，呢位今季被貶後備的里賈納球員都算運滯。
雖然波迷今季無機會睇到蘇拿比賽，但其實佢同所屬嘅卡利亞里好好景，禮拜日大勝榜首阿特蘭大「五個一皮」，而蘇拿亦寶刀未老，梅開二度後今季已累積十一個入球。卡利亞里唔經唔覺已經上番意乙榜第二，升班機會不俗，希望早啲可以再見蘇拿響意甲馳騁啦。
國際米蘭對布雷西亞前一晚，傳出布軍受流感影響，加埋主將巴治奧又因傷缺陣，幾乎連十六個球員都湊唔夠。由國米大前晚三更半夜落飛讓一球?球半，反映賭友收風快，但結果捧場客輸得眼都凸。睇番國米近八場得五分。同樣係毒草，人哋巴塞反晒底，唔知幾時到國米嘞。