睇嚟小初班老友決定暫時唔炒三四線股，轉炒較大隻的股份決定冇錯，噚日推介嘅華人置業（127）果然掂，大升12.2%，收5.30元。
經紀黃話，中資股相對安全，可留意在周四公布業績的首創置業（2868），上市第一年業績多數唔會差，加上貨源主要在芬佬手，有短炒價值。
首創近兩日股價表現特別好，噚日升5%，收2.625元，成交股數較平日為多，有成1625萬股，金額4179.9萬元。
首創招股預測03年全年賺2.41億元，經紀黃話問過分析員（唔係收錢嗰種），佢哋估計唔會有驚喜，但就一定符合預期，加上首創呢排動作多多，又在大陸發行A股，所以有留意價值。
另外，紡織股冠華國際（539），上個星期剛剛批完股，點知撞正廣興（1131）事件，加上配售代理又係瑞銀，而同一位分析員又品題過冠華，股價有乜辦法唔跌？冠華噚日急跌9.3%，收3.425元，批股價亦跌破。
慕容小初