一句「飲嘅係香港水，流嘅係香港血」而贏盡港人好感嘅曾蔭權司長，雖然低調，但關鍵時嘅講話，就極有份量，例如「大家唔好糾纏『愛國』問題上」，四両撥千斤，就激到想重搞文革嘅特區土共例如邵善波之流咬牙切齒。
煲呔處境艱難，上有一個無能龜縮嘅廢董，四周有目露兇光毫無人性嘅土共，煲呔唔可以行差踏錯，所以最近雖然連代表中產階級口味嘅《茶杯》月刊想訪問佢，佢都完全唔覆電話。
《茶杯》話事人劉細良唔係土共，梗係唔會咁小器，因為煲呔謝絕受訪而對佢有任何感情上嘅偏見。
今期將煲呔做封面，反而用理性同學術嘅專業角度，對煲呔呢個苦笑之中帶有淚光嘅歷史角色，有一番深入中肯嘅評析。
煲呔，唔使咁驚喎。冇咗你，香港更加唔掂，始終有好多人好錫你㗎嘛，使乜咁怕醜？想避記者、避左報同埋揩左嘅新進親中刊物就夠喇，香港中產階級同公務員睇你頭，要聽吓你有乜指示，至決定移唔移民，避咗場土共文革災禍㗎嘛。
（圖）煲呔可能怕行差踏錯，唔肯接受《茶杯》訪問。
傳真︰2623-9278
電郵︰