市場觀望滙控（005）業績，大市一度升破14000大關，但收市時升幅收窄至11點，收報13918，成交174.25億元。收市後，滙控公布盈利增長41%至88億美元，符合市場預期上限，喺舊年咁差嘅環境下仍有如此增長，重去邊度搵呢？咁優質嘅股票真係貴得有道理。
花旗先前一直睇好東方海外（316），認為股價可見29元，結果不負眾望，連31元都破埋。不過，噚日花旗轉軚唱淡，叫客戶沽貨，重將目標價降至23元，主要因為航運事業乃周期性行業，呢一期順境，下一期可能係逆境，所以到價就要沽貨獲利。
東方海外幾時步入逆境，阿虎唔多清楚，但阿董家族近年在市場上真係事事如意，既可低價向長和系回購，又可高價配股抽水。市場最近揣測阿董家族想增持，如果今次被花旗講中股價下挫，睇怕阿董家族又可以在低位增持。
曾經在40元水平高追金輝集團（137）的股民，今次可能有得震無得瞓，股價最近由高位大幅回落近30%，兼且成交日見萎縮，如果東方海外業務將步入逆境，金輝前景都唔好得去邊，想要見嘉誠證券預期的目標價64元，真係唔使諗，除非索羅斯真係入股。金輝噚日再跌6.3%至28.10元。
信用卡防盜（1051）早前獲首創集團及北京中信入股，加上首創話可能增持，已聞到鑊氣，而主席黃金富亦入市增持。據講此股遲啲可能有好勁嘅消息跟尾，黑客話與獲得國內銀行重大合約有關。
阿虎