手機扮GAMEBOY<br>NEC鏡盒手機冧女仔

手機扮GAMEBOY
NEC鏡盒手機冧女仔

好多人都話女人錢易賺，起碼連各大手機廠都係咁認為，專為女性推出的手機近年愈出愈多，「性別歧視」日趨嚴重。繼早前XelibriX6及PanasonicG70之後，專程來港𠝹女嘅就有NECN910，機身細不在話下，更精采就係首部粉盒式手機內置30萬像素鏡頭，玩完之後只可歎句點解今世要做男人！

記者、攝影：劉耀祥
ImageGirl：Cody

PROFILE
制式：GSM900/1800雙頻
顯示器：65,000色/128×160像素
鏡頭：30萬像素
功能：MMS、64和弦、GPRS、WAP
備用時間：70-110小時
通話時間：130-200分鐘
體積：57×52×22.5mm
重量：76g
查詢：23964545（迪生數碼）

外形徹頭徹尾以方角式設計的N910，似乎與女性的愛美觀念稍為背道而馳，不過NEC就成功將兩者二合為一，配以超細嘅57×52mm機身，而且機面鏡面鮮花圖案暗花，襯埋256色OLED，絕對為「女性手機」一詞創出新定義。N910體積接近一個正方形，由於機身太細未有頂手感覺，相反單手揭開機都好Easy。
外形夠特別之外，顯示器都相當特別，雖然只係6萬5色彩芒，尺寸亦並非特別大，但係NEC別出心裁，將一般機身的直身芒改為橫放，頓時眼界開揚得多，感覺就有如玩緊GBASP。

■鏡頭位於機身下方，影相時唔會俾隻手遮住。$5,580

■方形機身加上橫度芒，十足十GBASP。

橫度影相最啱睇
N910體積已經令不少女用家心猿意馬，不過NEC繼續再落「迷藥」，為N910加入30萬像素鏡頭，不單止可以影相，兼且更加可以拍攝15秒短片，配合橫度顯示彩芒，唔使打橫部機都可以影橫度相。雖然硬件配備強勁，若然玩意奇少，百萬像素鏡頭亦得物無所用，而N910影相時可以設定白平衡、15段變焦、3連拍、5種大小設定，以及多種特別效果，淨係影相都有排玩。除影相之外，就連拍片都一樣有得玩，3種大小及白平衡設定，就算係「大機」身上亦未必搵到。雖然N910用上TFT芒，不過感覺上色彩較暗，光度略嫌不足，幸好細緻度及清晰度都算合格。

■橫度機身影相更有「視覺享受」。

■影相時畫面旁設有功能選擇，設定容易。

簡體版照睇繁體
N910乃NEC特別為中國內地市場推出，而今次到港嘅N910理所當然地係內地行貨。向來內地行貨手機都以簡體中文為主，不論顯示及輸入都只有簡體中文，今次N910亦不例外，之不過筆者發現電話簿及SMS亦可以正常顯示繁體中文，而輸入法亦有「簡體筆劃」輸入法選擇，但字庫內已經內置不少繁體中文，換言之除功能選單以簡體中文顯示之外，香港人亦一樣啱使。
聲效方面，N910內置有64和弦，追上潮流大熱，音量亦都足夠，閂埋機都依然響亮。N910目前場內數量有限，所以價錢亦相當高企，現時街價要$5,580，想買畀女朋友或者老婆就真係要有番咁上下財力先得。