有良心大班之稱嘅滙豐亞太主席艾爾敦，喺樓價又瘋狂時叫港人冷靜，積咗好多功德。佢昨日出席業績簡布會時，被人發現去年酬金下跌咗百分之四，即場有記者代佢出頭，問佢嘅頂頭上司、滙控行政總裁葛霖，點解香港滙豐業績表現不俗，但艾大班竟然要被減人工，反而葛大班自己嘅人工就大大增加兩成八？
不過，葛霖都好醒目，唔肯親自解釋，一於玩拋波仔，笑笑口話此事應該由艾大班自己回應番至啱。呢個時候，坐喺葛霖身邊嘅艾大班都冇表現得唔開心，只係好輕描淡寫咁笑住話自己唔敢投訴酬金多定少，但係自己薪酬水平都只不過係跟隨香港嘅規律，即係香港人減人工，佢亦都一樣。八方睇番滙控年報，艾大班上年賺得一百一十萬英鎊，即係一千六百萬港元。咁高人工，比起特區好多尸位素餐得把口嘅偽精英，係值租嘅。
傳真︰2623-9278
電郵︰