港股連升11個月，恒指上到14000水平，3月係業績期，港股能否再向高位推進，要睇大藍籌業績是否好過市場預期，若屬正面，恒指將作最後衝刺，向14500至15000進發，然後才出現一次較大幅度的中期調整。
國企亦係呢個月派成績表，雖然市場已預咗盤數好靚，但實際業績相信仍會令人眼前一亮，所以，國企再創新高機會極大，而國企指數更有力升上5600至6000水平。
國企除業績利好外，人民幣升值的預期，亦對股價有正面作用，幾乎所有行業（航運除外）都受惠，特別係內地資產股同以人民幣為主要收入的公司，最為有利，而此類公司的股份，近期亦不斷見有基金增持。
十多日前，ValuePartners就增持莊士機構（367）5000萬股，相信係睇中莊士在內地的豐厚土儲，同埋股價大折讓有關。VP之前已持有莊士2261萬股，增持後持股量升到4.91%。
其實，唔單止VP增持，莊士主席莊紹綏由97年開始，就一直未有停過增持，踏入04年，亦增持咗7次，合共2800萬股，期內平均價由0.426元至0.548元。大股東咁積極，對公司前景樂觀之程度，可見一斑。
莊士主力在中港兩地經營地產，透過附屬公司莊士中國（298）在內地擁有4000萬方呎樓面儲備，03年3月底結算，莊士資產帳面淨值27.3億元，每股2.06元，計入兩次配售，每股資產淨值約1.88元，股價仍大折讓63%！
先講內地，4000萬方呎儲備集中在東莞、番禺同惠州等地，喺10年前好平價買入，呢幾年東莞同番禺嘅地已升值好多，家下逐幅發展，獲利自然好豐厚。莊士佔莊中60%，資產淨值水漲船高。
講番香港，莊士在旺區有40萬方呎嘅商場同商業大廈，上年度曾撥備3.07億元，家下樓價大幅回升，現年度好大機會回撥，連同售樓收入，只要有1.5億至2億元，莊士PE就會係好低嘅單位數。
莊士股價上周五回升，旗形調整完成，以量度升幅計，上破0.74元可向0.91元目標推進。
郭兆誠