上星期四，星期五兩日，中午中環馬莎門口人頭湧湧，馬路塞車，行人道就塞人。要由保安維持秩序。做乜事咁巴閉？皆因馬莎玻璃大櫥窗佈置成客廳，夫婦兩人坐在梳化閒話家常模樣，但兩位外籍模特兒身上，只有百分之三十左右穿上衣服，女模特兒夠晒性感肉感，外邊啲行人點可能視而不見呀，人人駐足觀看，於是路為之塞。
左丁山見到咁熱鬧，自然望兩望，唔夠五秒，已經俾人扯住膊頭，用英文講："you'llgetaparkingticket"回頭一望，乃鬼佬R是也，鬼佬R話：「此乃女士內衣推銷手法，呢隻牌子諗出呢條橋，夠煞食。」之不過，睇內衣嘅，男士居多，好多OL大概怕羞，唔敢多望，急步（其實人太多，急唔嚟）低頭而行，呢隻牌子嘅內衣恐怕搞錯對象。
鬼佬R嘅西裝左胸掛上一個Pin（胸針），圓形，問佢做乜鬼？鬼佬R立即拎多一個出嚟，送畀左丁山，睇真啲，上面寫住Democracy（民主）2007，左丁山嘩一聲：「講民主二○○七，你肯定唔係愛國者。」，鬼老R大笑：「我住響香港咁多年，仍然係美國人，一向愛國。」哦，咁重衰，鬼佬R就係美帝國主義者干預香港內部事務。鬼佬R話：「好多外國人干預香港事務啫，陳啟宗係我同胞，報紙上講愛國嘅名人係我哋好鄰居，加拿大人，佢哋猛咁講愛國，我講愛民主，有乜唔同，美國人與加拿大人都係既愛國，更愛民主嘅！」