容祖兒噚日去旺角，出席「仁人祖兒童義賣月發佈會」。祖兒全程笑容滿面，對住歌迷態度親切。剛巧噚日係佢師傅羅文嘅生忌，問祖兒會唔會有特別嘅感受？點知佢諗咗一陣，然後有啲尷尬咁話：「我唔係好記得佢新曆生日，只係記得舊曆咋！因為佢向來都係較注重舊曆，唔知今日係咪喎！」
提起早前Twins嘅鍾欣桐同方力申拍拖遊日本度歲，祖兒就話阿嬌係去咗英國，佢話：「係真㗎！我哋重有影相，啲相重喺我相機入面，真係覺得冤枉。」
祖兒又話喺英國拍廣告期間，有日去咗一間好出名嘅日本餐廳食飯，佢話：「嗰間嘢好多外國紅星去過㗎，我重諗會唔會撞到明星，點知一出舖頭，就見到門口有狗仔隊，重係黑人嚟㖭！」
此外，記者噚日喺羅文故居守候，但就未見佢嘅親人同生前助手阿東同Terry出現，而除咗廚房嘅窗口打開外，其他嘅窗都冇開兼拉晒窗簾。從廳嘅窗簾隙望入屋，之前本來有羅文嘅肖像同鍾馗像都已經唔見咗喇！
台灣歌手蔡依林噚日喺台灣為美國劇集《色慾都巿》宣傳，佢話喺四位女主角入面，最鍾意「只要性不要愛」嘅Samantha，蔡依林對於劇中四個女主角都係拜金主義者，佢就用國語話：「我不會刻意崇尚名牌，我買東西只會看適不適合，喜不喜歡，不會在意是否名牌。」
二人女子組合2R噚日喺粉嶺出席道路安全活動，Rosanne話：「我有揸過車，係個安全駕駛者。」但在旁嘅妹妹Race即刻踢爆家姐喺澳洲曾經撞過車。Rosanne就反駁話：「係意外嚟嘅，不過都好心痛架車花咗。」
陳欣欣噚日同一班有線電視足球評述主持，包括男友潘源良，一齊喺尖沙嘴出席「2004歐洲國家盃」記者會，同場加插由十位足球評述員表演Catwalk，欣欣覺得男友打完波太攰，所以行得好差。佢哋拍拖可以講係有線做紅娘，欣欣話男友平時只同朋友講波，唔同佢講，不過男友落場踢波，佢就一定坐場邊打氣。
周啟生早前曾經批評過楊千嬅臨急學唱歌，佢日前接受車淑梅訪問，講到呢件事時，話係世俗人對佢哋嘅誤會，而佢私底下同千嬅都好好朋友。另外，周啟生話當今樂壇之中最欣賞陳奕迅同李克勤，而且佢覺得容祖兒、吳浩康同鄭希怡唱歌都唔錯。
陳百強嘅老竇陳鵬飛籌備咗一個慈善音樂會，重請咗趙雅芝、奚秀蘭等人幫手，噚日喺尖沙嘴喜來登酒店舉行記者會，問到佢最近同陳百強媽媽重有冇聯絡，知唔知佢重有冇賭錢？陳鵬飛難為情咁話：「間中都有通電話，梗係希望佢冇賭錢啦，唔好再講呢啲嘢，好難為情。」
