喺二月初日本職業足球聯賽隊神戶勝利船破J聯賽紀錄，以四百五十萬美元（約三千五百一十萬港元）收購比錫達斯嘅靚仔球星伊利安，神戶職員話明希望借伊利安喺日本咁受歡迎（據講伊利安喺日本嘅受歡迎程度直迫皇馬嘅「萬人迷」碧咸），而令到神戶平均每場得一萬人嘅入座率，可以double。我求大俠當時聽到佢哋咁講，都係抱半信半疑嘅態度。
不過，原來伊利安真係咁勁，神戶喺前日宣布，話佢地喺三月十三日嘅J聯賽主場對古河市原嘅揭幕戰，三萬四千座位將會爆滿。姑勿論二十八歲嘅伊利安喺揭幕戰有乜嘢表現，起碼佢初步已經證明咗神戶今次冇入錯貨。
歐洲有唔少大球會同較細規模球會結盟，大球會替小球會出錢買人、小球會替大球會練兵，好似英超曼聯同比甲聯嘅安特衞普，以及阿仙奴同比華倫就係咁嘅關係。最近車路士亦打算咁做，但佢哋嘅目標係都算有名氣嘅荷甲燕豪芬。咁又係，有人出錢幫你買人，何樂而不為呢？
日本漫畫《足球小將》主筆高橋陽一，上周飛咗去西甲球會拉科魯尼亞實地考察，重大讚該隊中場華拿朗踢法君子又好波。之前高橋先生已經到過AC及巴塞等球會，將所見所聞作為漫畫內容；睇嚟《足》嘅往後發展，都會有拉科魯尼亞以及華拿朗出場，戴志偉又要遇上勁敵囉。
喺一月份返祖國效力高士路嘅巴西球星李華度，踢咗唔夠兩個月，又玩離隊！事件發生喺上周六，即係該隊教練盧森貝高離隊一日之後，李華度亦承認係同盧森貝高共同進退。點都好，到夏季轉會市場重開，呢位名將睇怕又會引嚟各大球會垂青，掀起另一次轉會熱潮。
唔知大家有冇發現，噚晚意甲祖記主場對安科納嘅強弱懸殊對碰，估安科納爆大冷贏四比○波膽，足智彩個賠率竟然得二十一倍咁少！我求大俠睇番其他公司，呢瓣都係幾百倍嘅大冷門；而根據有關人士解釋，應該係有球迷響呢瓣落注，由於賠率驚人，少少注碼都會變到咁熱囉。