CarreraCupAsia賽事又進行一年一度嘅參賽車手正式試車，地點係馬來西亞雪邦（Sepang）賽車場，我就去咗當地探查咗各車手嘅備戰工作，順道睇吓力圖衞冕嘅本港著名車手關兆昌賽前準備。
記者、攝影：黃江榮
唔知大家重記唔記得，喺去年舉行嘅澳門格蘭披治大賽中，香港車手關兆昌（CharlesKwan）大戰前一級方程式車手熊龍嘅保時捷CarreraCup賽事，雖然Charles最終力戰而敗，但亦能榮登全場總冠軍寶座，成為首屆CarreraCupAsia冠軍車手。
今年CarreraCupAsia賽事嘅統一規格戰車，仍屬保時捷911GT3Cup型號，不過就係比去年升級咗嘅2004Spec.版本。新車最大特色係改良咗進氣口，令低扭及馬力輸出都有所增強；同時，車廂操控裝置方面，加入咗轉波燈及水溫警告燈等配備，喺動力及操控上都有所提升，難怪Charles都認為2004Spec.嘅新車表現會更佳啦！今年有六隊係更換又或者係買入咗2004Spec.嘅新車，除了Charles所屬嘅車隊，有「泰國車神」之稱嘅拿達活，亦以新車應戰。
廠方特別安排咗保時捷廠隊車手列比（MarcLieb）到馬來西亞，擔任指導車手；列比不僅係歐洲CarreraCup賽事嘅冠軍，更同時曾駕駛保時捷賽車出戰FIAGT等賽事，並獲得優秀成績，實力自然不容忽視。喺佢所作嘅示範中，圈速比Charles嘅最佳圈速快出一秒多，因此Charles亦為座上乘客學習列比嘅駕駛方式。
除關兆昌、拿達活、馬清揚、邵玉龍、邵鐵龍等車手外，只有23歲嘅年輕車手歐陽若曦將代表本港捷成洋行出賽，連同日本、斯里蘭卡、台灣、馬來西亞及新加坡等國家車手，絕對可謂是亞洲精英車手賽。
喺為期兩日嘅測試中，關兆昌響芸芸參賽車手中，仍得到最佳圈速成績，僅次其後嘅係泰國車手拿達活，兩人都相信今年仍有一番惡鬥，而且今年嘅保時捷CarreraCupAsia賽事更同時係兩場一級方程式（馬來西亞、中國上海）嘅支援賽事，並以澳門大賽車作為壓軸戰，所以相信會吸引到更多亞洲各地車迷所注視。
作為1號車衞冕冠軍嘅關兆昌，壓力自然不少，因此佢亦會放棄喺日本出戰GT賽，專心一意為爭取呢項賽事嘅好成績而努力；作為代表香港參賽，挑戰亞洲各國好手，CharlesKwan我哋一定支持你！
