早前無綫體育節目主持曾偉忠，在節目中誤將金猴讀成粗口「×猴」，誰知陳小春亦受同一個音所累，前晚於其尾場演唱會上，誤將今年說成「×年」，令全場觀眾嘩然。
陳小春前晚在紅館舉行尾場「陳小春夜生活演唱會」，他與風火海舊拍檔謝天華及朱永棠一同演出時，竟將今年說成粗口「×年」，小春說：「我舊年都想請佢兩個做嘉賓，點知佢哋要收錢，不過×年……」
小春話未說完已知失言，觀眾也即時同聲大叫：「啊！」小春心情平復後，當作沒事發生，繼續說：「今年唔收錢喎，咪做囉！」事後小春在慶功宴上說：「我冇諗過㗎，我哋呢啲讀過書嘅，唔會講粗口㗎。」
小春說罷即忍不住笑，他說：「你哋聽錯，係咪幻覺呀？我成日講錯嘢，唔係專登㗎，我鄉下唔同，我客家人嘛，對唔住，我唔係有心，可能我個口生飛滋先講錯嘢。」
除了風火海舊拍檔謝天華和朱永棠及老友杜汶澤外，前晚小春亦邀請了郭富城擔任表演嘉賓，由風火海伴舞，城城還大爆小春以前在無綫讀舞蹈訓練班時，只讀了一個月，謝天華隨即說：「佢俾人踢出校嘛！」小春即作狀踢謝天華說：「你講乜呀？」
小春接受訪問時解釋：「你知啦，我屋企好『有』錢㗎嘛，得七百蚊車馬費，我又一家大細咁多人，點做啫？咪出去唱酒廊囉。」提到杜汶澤爆小春經常「俾女撇」，小春笑說：「你哋當係咪係囉，我下次唔搵佢做嘉賓嘞！」
小春在慶功宴上，攬着謝天華和朱永棠，又錫二人臉頰，他說：「嗱，我哋冇不和㗎！」實行以行動證明與朱永棠沒因張栢芝而有心結。
前晚小春母親、梁漢文、蘇永康、2R、Cookies、阮兆祥及趙學而等都有捧場，惟獨其緋聞女友張栢芝兩晚都沒有現身。
採訪：胡比 攝影：陳偉權
