赤柱大家去得多，但赤柱西面嘅舂坎角多數為人忽略，舂坎角雖然無赤柱市場畀你Shopping、無美利樓呢類高檔食肆，但遊山玩水一樣掂，英軍炮台、無敵望海BBQ場、華仔同哥哥都取景拍戲嘅瞭望台，燒完嘢食再沙灘漫步，全程2小時，夠你拖住Honey浪浪漫漫消磨一天半日嘞啩？
記者：陳震霖 攝影：楊錦文
模特兒：Katrina、Kelvin（Imagine）
舂坎角迴旋處落車，向慈氏護養院方向行，單程馬路平坦易行，有講有笑，輕輕鬆鬆20分鐘行到盡頭，眼前出現1個白色半球狀物體，外形有啲似尖沙嘴太空館，乜東東？英軍炮台是也。炮台建於1930年，附近重有一排廢置英軍軍營，炮台？無炮嘅？原先2門6吋大炮老早搬走，換嚟3張石枱櫈，變身情侶談情勝地。
炮台對面有3個燒烤爐，爐無錯係少啲，但舂坎角位置偏僻，無赤柱正灘燒烤場咁人迫，加埋無敵大海景，BBQ無得頂，食飽，落下面瞭望台，同另一半海誓山盟都重得。
左手面有樓梯直落瞭望台，呢個瞭望台都算巴閉，先後有華仔、Gigi主演嘅《烈火戰車》同哥哥、林嘉欣主演嘅《異度空間》喺度取景，又難怪嘅，半圓形瞭望台對住藍天碧海，個景靚到無倫，唔攞嚟拍戲認真大嘥。呢度一樣係拍拖熱點，唔少情侶鍾意喺度吹海風，唔信？留意吓牆身，N咁多「Love」嚟「Love」去之類嘅甜言蜜語，不過千祈唔好手多留言，污染環境，話明「談」情「說」愛，動口不動手。
吹完海風，想繼續浪漫？都得，舂坎角海灘漫步睇日落，點睇？舂坎角海灘泳灘級別屬良好，比起赤柱正灘，明顯更水清沙幼，少受污染，海岸線只得200米，慢慢行，剛剛好睇得晒日落。
去海灘之前會先經過舂坎角公園，公園內有1部動物發聲機，勁搞鬼，只要你轉手掣6個圈，就會發出唔同嘅動物叫聲，啲聲重好神似㖭；另外重有棵必睇嘅奇樹，遠睇無咩嘢，近睇會發現蕉樹同榕樹居然出自同一樹幹，雖然接口位明顯由人工造成，但足以吸引Kelvin佢哋嘅注意力。
舂坎角係港島區頂級豪宅集中地，環境清幽美麗，差不多每個單位都有無敵大海景。豪宅，暫時我哋買唔起，但可以免費欣賞，離開海灘，沿舂坎角道轉入環角道，左右兩旁豪宅，幢幢落地玻璃、紅磚圍牆、偌大花園，呢啲咪叫靚樓囉。
環角道重有間建於1964年嘅觀音寺，創寺者叫比丘茂昆法師，開頭只係一所簡陋到無倫嘅茅篷，但慕名而來者眾，故香火鼎盛；4年後，寺院擴大修建，加建佛殿、齋堂，方便善信參拜；至1975年，衣缽傳至寶嶧法師，佢喺殿後建造一座手持玉瓶、腳踏鰲魚嘅望海觀音像，像高50呎，一身白色素衣，像下面重有副勸人行善積德嘅對聯。
除咗望海觀音像，最值得一睇嘅係40幅瓷磚拼畫，以半圖半文形式描繪佛陀、觀世音菩薩32件事迹。觀音寺現時除每月自辦禮懺法會外，重同香港佛教青年協會合辦每月生日會，適逢觀音寶誕，有成千信眾嚟參拜都唔奇。
去程：中環交易廣場巴士總站乘6X巴士（$8.4），赤柱村巴士總站下車，再轉的士（約$25）直入舂坎角炮台。
回程：環角道觀音寺門口乘63巴士（$8.4），返回天后地鐵站。
