近排有關地產嘅新聞，都係圍繞炒風復熾與否嘅話題，業內人士一如既往否認。過去六年難得一見樓市好景，業界唱好樓市、推波助瀾嘅動作一定會繼續，除咗新盤努力造勢之外，二手屋苑造價幾乎日日有新高。
中原地產施建宙話，南豐新邨四座中層F室，上月初由炒家以一百三十四萬購入，稍為翻新一吓，早兩日以一百六十萬賣咗畀同區一個分支家庭客，一個月帳面賺廿六萬，單位四百七十四呎，呎價三三七六元。廿幾年舊樓，呎價竟同部份新盤相差無幾，值唔值？作為外區人，真係好難理解。
另外，八座高層H室，六百九十二呎，成交價又係創新高，去到二百二十一萬元，施建宙話，同類單位咁嘅價位要追溯番去九九年。聽講名炒家嚿年十一月買入，只係一百六十萬，三個月就賺六十一萬。
樓市升咗唔夠幾個月，舊屋苑呎價貴過新區新樓，個別成交一下子輕易升番去五年前嘅水位，短炒獲利水位咁高，究竟係市場自然調節，定係人為炒作呢？真係應該深思一番。
保安員係管理公司保護業戶嘅最前線員工，所以好多管理公司都會藉參加比賽嚟提高保安員嘅服務水平。○三年度「東區傑出警衞獎勵計劃」，富城集團就有九十五個保安員攞到獎。
呢批保安員嚟自五個屋苑，包括北角海峰園、鰂魚涌栢蕙苑、西灣河鯉景灣、筲箕灣愛蝶灣同東駿苑。唔知住喺嗰度嘅住戶會唔會住得安心啲呢？又買家會否因此加分？
另外，富城早前攞到僱員再培訓局嘅僱主金星白金大獎，聽佢哋講，富城只係請咗三百八十個再培訓學員，但因為流失率較低，得三個巴仙，估計因為咁至到獎。
曾經係城中話題嘅CEPA，近排人氣度好似低咗好多，大眾注意力去晒炒賣物業，賺快錢為上，只要睇吓每日排山倒海嘅地產新聞稿，十之八九都係講炒家勁賺幾十萬到幾百萬。長遠經濟發展重要性？CEPA嘅救港功能？彷彿已經不再重要了。
雖然社會注意力不再，但確實有唔少香港貨，喺CEPA嘅優惠底下，正逐步打入內地主要城市，其中首批由香港運抵北京嘅零關稅時裝，上星期已經率先喺當地嘅東方廣場TSE時裝店出售，一共有65件高檔貨，其中56件屬於香港原產地，每件賣成三千人民幣，總共可免繳462美元關稅。聽講批貨首賣當日，大清早已經吸引市民選購。
樓市突然轉勢，重由住宅燒到工商物業㖭。聽業內人士講，𠵱家市場上甲級商廈供應大減，投資者甚至願意接番炒家放出嚟嘅單位，用家也開始面對現實，唔等平貨，銀主盤更絕無僅有㖭，只係得番乙同丙級商廈銀主貨，睇嚟重有排玩。
買賣市場暢旺，輪到買家擔心業主唔肯放盤，搞到買唔成樓。不過，租務市場就因為供應多，交投同價格升幅自然唔夠買賣勁。
信和物業管理喺農曆年期間，搞咗個最佳服務員選舉，以一戶一票形式，向旗下超過一百個物業及商場業戶發出選票，結果收番七千幾張選票，投票率高逾四成，同嚿年十一月區議會選舉投票率差唔多，反映香港人嘅投票意識真係高咗好多。
信和物業管理總經理杜日生話，為進一步令員工掌握服務顧客嘅重點，會聘請顧問公司提供特別訓練，提高員工應對、待客甚至儀容方面嘅技巧。其實有規模嘅管理公司，都好注重員工培訓及儀容，以往踢拖返工嘅阿伯型管理員，睇怕都已經絕迹囉。
蘭西
電郵地址：
