鄧兆尊前日出席剪綵活動時，批評無綫新制「一年一騷」只會流失重要藝人。兆尊又指無綫興建將軍澳電視廣播城是失敗決定，還揚言自己隨時不做。
鄧兆尊和羅明珠前日在東莞為一間餐廳做剪綵嘉賓。兆尊對於近日梅小惠被調出劇集《皆大歡喜》，他說：「我都停咗二十幾集，不過冇問原因。幾好，有假放。我聽聞《皆大歡喜》會加入羅浩楷、劉愷威同華姐鍾嘉欣。我份合約到十一月，原本五月可以爆騷，但𠵱家停咗一排，要到七月先爆騷，我過幾日會開番工。」
對於無綫減藝人騷以節省開支，兆尊說：「冇用㗎，無綫係一間工廠，計生產量唔計質量，每有新高層上場都有唔同政策，呢個方法冇用。」至於無綫向部份藝人實施「一年一騷」制，他說：「咁做對藝人冇保障，會流失重要嘅人。」
兆尊又批評無綫興建將軍澳電視廣播城不恰當，他說：「我覺得起將軍澳電視廣播城失敗，都唔識計成本，我身為外行人都覺得佢用錯材料，好似餐廳點會用木嚟起？咁咪要年年換？設計師揀料應慳又唔慳。我係咪好寸？我預咗唔撈。」
問兆尊是否對無綫心淡？他說：「少少，公司有好多綠葉，對劇集好重要，佢哋（指公司高層）做錯咗，我唔會咁做。」
此外，張兆輝對於無綫的減騷制亦有微言，他昨日說：「𠵱家無綫咁嘅流水作業嘅制度，令到大家好冇士氣，做得好又要減騷。員工會做又三十六，唔做又三十六，所以我決定離開公司闖吓。」
記者魯萍東莞直擊
