前綫劉慧卿前排回應梁振英嘅戰書，曾經邀請過振英兄噚日去旺角行人專用區，出席公開論壇拗一番，後來振英兄拒絕，其人𠵱家重上埋北京開政協常委會議，月中先返。
雖然人都唔喺香港，但係人民力量不可欺，戰書一出就收唔番，旺角噚日下晝周街有人問擺檔做選民登記嘅卿姐：「梁振英去咗邊？」後來知道振英兄唔會嚟，就好失望咁走咗，睇嚟佢老兄月中返香港之後，點都要出嚟一次見吓群眾先得。
講到選民登記，民主派、左派都出力谷到盡，卿姐噚日就趁四年一次嘅二月二十九號，出埋甜頭吸引市民登記，凡係二月二十九號出世嘅市民，男嘅送領呔（可惜唔係金利來），女嘅送香水絲巾，請埋香港「三大護法」幫手叫咪，反應總算唔錯。
（圖）卿姐喺街頭宣傳選民登記，又送絲巾又送領呔，相當落力。
陳亮華攝
傳真︰2623-9278
電郵︰