君臨天下賣得，呎價將近10張金牛，恒隆系公司可能受到追捧，不過兩隻恒隆，得隻恒隆地產（101）有Call輪9318，只此一件咁大把。
9318今年11月到期，輪價1.56元，溢價7.2%，槓桿率7.2倍，今朝如果唔係升得太多，玩少少無妨，要大玩亦唔易，皆因隻輪交投疏，上周五有83萬份易手，已經算比平日多好多。
新地（016）、恒地（012）、長實（001）與新世界（017），上周五已經帶住個市急升，若因樓市熱炒而再大步彈上，高價追Call輪可能要諗吓，驚住大市有獲利回吐。地產股可以繼續睇好，但穩陣嘅做法係吼稍為回順時，低低哋收集。
另一個做法比較安全，就係揸恒指Call輪。地產股若然有獲利回吐，其他大隻藍籌頂上，揸恒指Call輪冇輸蝕，對象有3件，9282、9237、9220。9282今年5月夠鐘，輪價34.5仙，溢價1.2%，槓桿率13倍。9237喺4月到期，輪價42.5仙，負溢價0.1%，槓桿率9.4倍。9220亦係4月夠鐘，輪價46.5仙，溢價0.2%，槓桿率10.4倍。恒指Call輪溢價咁低，係因為到期前好多大藍籌截息，打埋股息因素落去，溢價大概提高一兩個巴仙。
國企股普遍有力續上，小敲中企Call輪，9363同9444可以諗吓。
章盛