由胡溫一手策劃、土共圍攻狂噬嘅「愛國文化大革命」，不斷深化，一片形勢大好。正當土共左仔點名劉慧卿、司徒華、李柱銘等人為「黑四類」，並準備繼續揪出港英殘渣餘孽曾煲呔、林瑞麟、李國章，並隨時發動維園阿伯及校園暴力小將做「愛國街頭糾察隊」，進一步架空警務處處長權力之際，好可惜，身為政協副主席嘅霍英東，竟然發出唔同嘅聲音，當被問及支聯會人員可唔可以參選立法會，霍老竟然話：每一個香港公民都有權參選！
霍英東（呀唔係，係霍中東至啱）嘅指示，側聞當堂令到一小撮土共好憤慨。大家都問：霍生究竟係邊個司令部嘅人？《文匯報》已劃出「黑四類」，愛國同胞乘勝追擊，殲滅司徒華劉慧卿等反中亂港勢力有望，如岳家軍直搗黃龍，呢頭霍老包庇支聯會，暗撐司徒華，係咪即是想破壞呢場愛國文化大革命？邊個係霍老嘅黑後台？
因此，為確保特區江山一片紅，今個月政協人大開會，有啲愛國志士準備一不做二不休，迫胡溫兩個到會親自表態，若然可以焗到胡溫親自發言，點名批判司徒劉李，咁就一天光晒。大家準備鬥提議案，要求先易後難，先處理「黑四類」問題，再重新提交二十三條立法，將鄧小平講話，凌駕於《基本法》之上，即是喺一棟大廈，僭建多一個鐵皮天台，再加埋「姬老講話」、「曾憲梓唱歌主旋律」、同埋「狗餅庸餵狗條件反射理論精神」，好似一塊塊生銹簷篷同黃色光管招牌咁，基本法呢座落成咗十零年嘅大廈，就當堂好似佐敦道一帶長年失修嘅鹹水樓咁，充滿中國特色嘞。
土共點名誹謗司徒劉李，但人哋係依法選出嘅議員。治港嘅隊伍要以所謂「愛國者」為主體，而治港隊伍就包括行政、立法、司法，所以雖然司徒華等人並無執政權力，都俾土共入埋數當埋係「治港班子」！
不過，當上訴庭同高院嗰啲鬼佬法官，知道自己都要「愛」埋一份「國」，先愛國，後判案，據講好多鬼佬法官私底下都笑住話啲土共好Stupid，佢哋有意提早退休唔撈，無謂同土共癲，讓位畀大紫荊楊光、工聯會鄭耀棠同埋維園阿伯組成愛國高等法院、愛國上訴庭、愛國終審法院，以後慢慢唱完《沒有共產黨就沒有新中國》之後，兼向支鐮刀共產旗三鞠躬先，然後至坐低扑槌升堂嘞。
傳真︰2623-9278
電郵︰