三月三十一日香港足球隊喺主場迎戰國家隊，爭世界盃外圍賽亞洲區第四組榜首大戰，香港一定要放水輸畀中國隊，否則就大大傷害十三億人民嘅感情，削弱中央嘅權威，破壞共黨嘅領導優勢，令一國兩制中嘅一國冇晒地位，罪名好大。
所以，由廢董領導嘅特區政府，以及一眾被中央、左報及愛國領呔大王定性為黑四類嘅人士應該振臂一呼，先叫停三月二十六至二十八日喺大球場舉行嘅七人欖球，多多錢都要唐唐賠，等大球場嘅草地唔會被啲鍾意裸跑嘅鬼子馬徹底破壞，令到中港大賽要喺嘅小西灣運動場舉行。
第二，要禁止黎新祥同港隊集訓，因為上次只有兩日備戰，都贏咗馬來西亞三比一，今次只可派啲跛手斷腳嘅球員落場，一來實現平機，二來輸波方便，再經過「狗餅庸」鄔醫生磁力共振腦部愛國思想測試，好似死狗咁十拿九穩先可出賽。
如果中國隊入到十比○，睇怕胡溫嘅怒火會減弱少少，或者會喝令啲土共蠻狗咪吠到咁耳襲都未定。
（圖）由於大球場要養草，中港世界盃外圍賽大戰，會喺呢個小西灣運動場舉行。
傳真︰2623-9278
電郵︰