每年都搶閘喺奧斯卡前一日舉行、選出全年最差電影嘅金草莓電影頒獎禮，前日啱啱喺加州圓滿結束。
由班亞弗力（BenAffleck）同前女友珍妮花洛庇絲（JenniferLopez）主演嘅《愛情標錯心》，以大熱姿態贏咗六個大獎，成為史上第一部囊括金草莓六個主要獎項嘅爛片，我羅拉真係冇眼睇啦！
《愛情標錯心》呢套片，係講述由籮霸飾演嘅同志女殺手，俾飾演蠱惑仔嘅班仔由攣拗番直，呢啲橋段，聽落去都覺得無聊。結果《愛》片喺一致睇好之下，贏咗最差電影、最差導演、最差劇本，而班仔同籮霸，當然贏埋最差男、女主角同最差銀幕拍檔啦！
好在嘅係，《愛》片今次攞六個至爛大獎，仍未打破《艷舞女郎》同《末日反擊戰》一屆攞七個獎嘅紀錄。不過，金草莓嘅發言人話：「呢套片雖然攞少一個獎，不過我肯定《愛》片重爛過所有片，起碼觀眾睇《艷》片同《末》片，都得啖笑吖。」
唔講你唔知，《愛》片原來用咗四億二千萬港紙嚟拍，但係時至今日，都只係收得嗰四千六百萬港紙咋，真係蝕到入肉呀陰公！
另外，金草莓嘅最差男女配角，分別由主演《非常小特務之3D立體出擊》嘅史泰龍（SylvesterStallone）同《神探俏嬌娃２指環密令》嘅狄美摩亞（DemiMoore）奪得，原來史泰龍已經攞咗第十個金草莓獎，又創咗新紀錄，真係瘀到爆呀！