大使上星期二出席蘋果日報慈善基金一年一度舉行嘅簡介會，向社會服務機構代表推介基金嘅工作，同埋解釋申請社會服務計劃資助詳情。
今次簡介會喺社聯新裝修嘅禮堂舉行，估唔到反應咁熱烈，成個禮堂唔單止座無虛席，重要坐埋樓上，大使計過總共有超過一百八十人出席，可謂盛況空前。
蘋果基金愛心基金委員會主席許賢發太平紳士、委員邱可珍太平紳士都有出席，我哋重好榮幸邀請到香港骨髓捐贈基金、聖雅各福群會同埋基督教家庭服務中心三個機構嘅代表出席，分享蘋果基金撥款行動對佢哋嘅幫助。
其中，香港骨髓捐贈基金榮譽秘書梁憲孫教授話，骨髓基金同蘋果基金攜手搞過幾次驗血大行動，由於每個血液樣本驗血費要成五百蚊，如果唔係蘋果基金資助，佢哋根本負擔唔嚟；另外，佢亦都話蘋果基金幫過好多血癌病人籌錢買新藥醫病，造福唔少病人，佢重代表一班受惠病人多謝我哋。
梁教授實在言重，誠如許賢發太平紳士喺會上所講，基金啲錢係廣大讀者捐出嚟，如果籌咗啲錢唔用，我哋點向公眾交代呢？所以只要用得其所，我哋一定唔會托手踭嘅。
另外，提一提大家，三月份嘅社會服務計劃撥款申請已經喺上周五截止，基金委員會會喺三月尾開會，審批結果暫定四月初公布，到時機構會收到通知。查詢電話：29908688。
暖流熱線
電話：29908688
傳真：23702192
電郵：
網址：